ყოველდღიური გადაცემა ბიზნესზე ქართული ტელევიზიის განვითარებაში ის ახალი მიჯნაა, რომელსაც “ბიზნესკურიერი” ჰქვია.
გადაცემაზე მუშაობენ ეკონომიკური განათლების მქონე საუკეთესო ჟურნალისტები და ჟურნალისტური ნიჭის მქონე ბიზნესსკოლების კურსდამთავრებულები.
“ბიზნესკურიერის” რედაქცია მიიჩნევს, რომ ბიზნესი საქართველოში აღარ უნდა იყოს ადამიანთა ვიწრო წრის ექსკლუზიური სფერო და ის ყველას უნდა ესმოდეს, ხოლო ვინც ენერგიულია და ნიჭიერი, ის პირად სარგებლობასაც უნდა ნახულობდეს. ამის გამო, ბიზნესსიახლეებს ჩვენ ყველასთვის გასაგები და საინტერესო ფორმით წარმოვადგენთ. გადაცემა სამ უმნიშვნელოვანეს ფუნქციას შეასრულებს:
- ბიზნესში უკვე ჩართულებს მთლიან ბიზნეს-გარემოს დაანახვებს, მიუთითებს მოსალოდნელ ცვლილებებზე და საუკეთესო ბიზნეს-სტრატეგიას უკარნახებს;
- ბიზნესისგან მოშორებით მდგომებს აუხსნის, რა პერსპექტივა არსებობს მათთვის ბიზნესში ჩასართავად, რა არის ამისთვის საჭირო და შედეგად, რა პერიოდში რას უნდა ელოდონ.
- ყველას ერთად აუხსნის მთავრობის ეკონომიკური პოლიტიკის არსს და მოსალოდნელ შედეგებს, ხოლო მთავრობას დაანახვებს, რა პრობლემები აქვს ბიზნესს და რა რეფორმებია საჭირო
“ბიზნესკურიერი” ყველას გადაცემაა, - ნებისმიერი პროფესიისა და ასაკის ადამიანი უამრავ იდეას იღებს იმის შესახებ, თუ როგორ გაიუმჯობესოს ცხოვრება, როგორ გამოიყენოს საკუთარი პოტენციალი, ცოდნა და გამოცდილება, როგორ იშოვოს და როგორ დახარჯოს ფული. ახალ შემადგენლობასთან ერთად “ბიზნეს-კურიერში” პოპულარული “60 წუთის” შემადგენლობა მუშაობს, მათ ყველაზე კარგად იციან რა სჭირდება ხალხს. |
